ଜ୍ୟୋତିବିହାରରେ “ଶ୍ରୀରଙ୍ଗ ସମାଗମ” ନାଟ୍ୟୋତ୍ସବ ଉଦ୍‌ଯାପିତ

ସମ୍ବଲପୁର- ଶ୍ରୀକଲଚରାଲ ଏସୋସିଏସନ୍ ଓ ସମ୍ବଲପୁର ବିଶ୍ୱବିଦ୍ୟାଳୟର ପ୍ରଦର୍ଶନ କଳା ବିଭାଗର ମିଳିତ ଆନୁକୂଲ୍ୟରେ ଜ୍ୟୋତିବିହାର ବିଜୁ ପଟ୍ଟନାୟକ ଅଡ଼ିଟୋରିୟମ୍ଠାରେ ଜାତୀୟ ନାଟ୍ୟ ଉତ୍ସବ ଶ୍ରୀରଙ୍ଗ ସମାଗମ -୨୦୨୪ର ଆଜି ଉଦ୍ଯାପିତ ହୋଇଯାଇଛି । ଉଦ୍ଯାପନୀ ସନ୍ଧ୍ୟାରେ ସମ୍ବଲପୁର ବିଶ୍ୱବିଦ୍ୟାଳୟର କୁଳପତି ପ୍ରଫେସର ବିଧୁଭୂଷଣ ମିଶ୍ର ମୁଖ୍ୟଅତିଥି ଏବଂ କୁଳସଚିବ ଡ. ନୃପରାଜ ସାହୁ ଏବଂ ପ୍ରଫେସର ଅଜୟ ବେହେରା ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । ଏସୋସିଏସନ୍ର ନିର୍ଦ୍ଦେଶକ ସତ୍ୟରଞ୍ଜନ ବେହେରା ସଭା କାର୍ଯ୍ୟ ସଂଯୋଜନା କରିଥିଲେ । ଦେବଗଡ଼ର ବିଶିଷ୍ଟ ନାଟ୍ୟବ୍ୟକ୍ତିତ୍ୱ ହେମନ୍ତ କୁମାର ମହାପାତ୍ରଙ୍କୁ ଶ୍ରୀ ନାଟ୍ୟ ସମ୍ମାନ-୨୦୨୪ରେ ସମ୍ମ୍ାନିତ, ପ୍ରଦର୍ଶନ କଳା ବିଭାଗର ଆସିଷ୍ଟାଣ୍ଟ ପ୍ରଫେସର ଅରବିନ୍ଦ ପଣ୍ଡା ଓ ବୁର୍ଲାର ନାଟ୍ୟ ଅଭିନେତା ଓ ସଂଗଠକ ଜୟନ୍ତ କୁମାର ଦାଶଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏହି ଅବସରରେ ଶ୍ରୀକଲଚରାଲ ଏସୋସିଏସନ୍ ପକ୍ଷରୁ ପ୍ରଦର୍ଶନ କଳା ବିଭାଗର ସଂଯୋଜକ ପ୍ରଫେସର ଗୋପୀନାଥ ବାଗ୍ଙ୍କୁ ସ୍ମୃତି ଚିହ୍ନ ପ୍ରଦାନ କରାଯାଇଥିଲା ।

ଉଦ୍ଯାପନୀ ସନ୍ଧ୍ୟାର ସମ୍ବଲପୁରୀ ନାଟକ ଅର୍ନ୍ତଦହନକୁ ଶ୍ରୀ କଲଚରାଲଏସୋସିଏସନ୍ର କଳାକାର ଦିଲୀପ କୁମାର ଦେବ ପରିବେଷଣ କରିଥିଲେ । ଆଶୀଷ କୁମାର ସୋନାର ଏହାକୁ ରଚନା ଏବଂ ନିର୍ଦ୍ଦେଶନା ଦେଇଥିଲେ । ସଂଗୀତ ନିର୍ଦ୍ଦେଶକ ଥିଲେ ସୌମ୍ୟଜିତ୍ ବଡ଼ପଣ୍ଡା ଓ ଆଲୋକ ବିନ୍ୟାସ କରିଥିଲେ ସତ୍ୟରଞ୍ଜନ ବେହେରା । ପରେ ଶତାବ୍ଦୀର କଳାକାର, ଭୁବନେଶ୍ୱର ଦ୍ୱାରା ପରିବେଷିତ ଧୀର ମଲ୍ଲିକଙ୍କ ରଚିତ ଓ ନିର୍ଦ୍ଦେଶିତ ଓଡ଼ିଆ ନାଟକ ଜୀବନ୍ୟାସ ପରିବେଷଣ କରାଯାଇଥିଲା ।

ଦ୍ୱିତୀୟ ଦିବସରେ ମୁଖ୍ୟଅତିଥି ଭାବେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଯୋଗ ଦେଇ ଉଦ୍ବୋଧନ ଦେଇଥିଲେ । ଏଥିରେ ଶ୍ରୀକଲଚରାଲ ଏସୋସିସନ୍ ଏବଂ ଜ୍ୟୋତିବିହାର କଳା ବିଭାଗ ପକ୍ଷରୁ ସତ୍ୟରଞ୍ଜନ ବେହେରାଙ୍କ ରଚିତ ସମ୍ବଲପୁରୀ ନାଟକ ସାଧନା ପରିବେଷିତ କରାଯାଇଥିଲା । ଏହି ଅବସରରେ ପ୍ରତିଷ୍ଠିତ ମଞ୍ଚ ଅଭିନେତା ଏବଂ ସଞ୍ଜୀବ ମାଝୀଙ୍କୁ ଡ. ପଞ୍ଚାନନ ମିଶ୍ର ସ୍ମୃତି ସମ୍ମାନ ପ୍ରଦାନ କରାଯାଇଥିଲା ।

ଏହି ନାଟ୍ୟ ଉତ୍ସବର ପ୍ରାୟୋଜକ ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ଥିବା ବେଳେ ଏଥିରେ ସହଯୋଗ କରିଥିଲେ ମହାନଦୀ କୋଲ୍ ଫିଲ୍ଡସ ଲିମିଟେଡ଼ ।