ନିଖୋଜ ଦୁଇ ସ୍କୁଲ ଛାତ୍ରୀଙ୍କ ଶବ ଝୁଲନ୍ତା ଅବସ୍ଥାରେ ଏମପିଭି ୪୧ଗ୍ରାମ ନିକଟରୁ ଉଦ୍ଧାର, ଆତ୍ମହତ୍ୟା ନା ହତ୍ୟା ସନ୍ଦେହ

ମାଲକାନଗିରି, ୮ଫେବୃଆରୀ- ମାଲକାନଗିରି ଜିଲ୍ଲା କାଲିମେଳା ବ୍ଲକ ଏମପିଭି ୪୧ ଜଙ୍ଗଲରୁ ୨ ସ୍କୁଲ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି। ସେମାନଙ୍କ ବେକରେ ଓଢଣି ଲାଗି ଏକ ଗଛରେ ଝୁଲୁଥିବା ଦେଖିବାକୁ ମିଳିଛି । ସେମାନେ ଏମଭି ୭୨ ପ୍ରାଥମିକ ନୋଡାଲ ବିଦ୍ୟାଳୟର ଛାତ୍ରୀ ହୋଇଥିବା ବେଳେ ଦୁହେଁ ନିଖୋଜ ହେବା ଓ ଦୁଇ ଦିନ ପରେ ସ୍ଥାନୀୟ ଜଙ୍ଗଲରୁ ମୁମୂର୍ଷୁ ଅବସ୍ଥାରେ ଉଦ୍ଧାର ହେବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଛାତ୍ରୀ ଦୁହିଁଙ୍କୁ କେହି ଦୁର୍ବୃତ୍ତ ହତ୍ୟା କରି ଗଛରେ ଝୁଲେଇ ଦେଇ ଆତ୍ମହତ୍ୟାର ରୂପ ଦେବା ପାଇଁ ଚେଷ୍ଟା କରିଥିବା ସନ୍ଦେହ ଉପୁଜିଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।

ସୂଚନା ମୁତାବକ, ଏମ୍ଭି-୭୪ ଗ୍ରାମର ଜ୍ୟୋତି ହାଲଦାର ଓ ଏମ୍ଭି-୧୨୬ ଗ୍ରାମର ମନ୍ଦିରା ସୋଡ଼ି ଉଭୟ ଛାତ୍ରୀ ଏମ୍ଭି-୭୨ ନୋଡାଲ୍ ଉଚ୍ଚ ପ୍ରାଥମିକ ବିଦ୍ୟାଳୟରେ ସପ୍ତମ ଶ୍ରେଣୀରେ ପଢ଼ୁଥିଲେ । ଗୁରୁବାର ସ୍କୁଲ୍ ଛୁଟି ପରେ ଉଭୟେ ଦୀର୍ଘ ସମୟ ଧରି ଘରକୁ ଫେରିନଥିଲେ । ଦୁଇ ଛାତ୍ରୀ ଘରେ ପହଞ୍ଚିବାରେ ବିଳମ୍ବ ହେବା ପରେ ପରିବାର ଲୋକ ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ପାଇନଥିଲେ | ସ୍କୁଲ ଛୁଟି ପରେ ଦୁହେଁ କେଉଁ ଆଡ଼େ ଚାଲି ଯାଇଥିଲେ । ଘରକୁ ନ ଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିଥିଲେ ବି ସେମାନଙ୍କ ସନ୍ଧାନ ପାଇ ନ ଥିଲେ । ପରେ ଏମଭି ୭୯ ଥାନାରେ ଅଭିଯୋଗ କରିଥିଲେ । ତେବେ ଶନିବାର ସକାଳେ ଏମପିଭି ୪୧ ଗାଁର ନିଛାଟିଆ ସ୍ଥାନରେ ଥିବା ଏକ ଗଛରେ ଉଭୟଙ୍କ ଝୁଲନ୍ତା ମୃତଦେହ ଗାଁ ଲୋକେ ଦେଖିବାକୁ ପାଇଥିଲେ । ଏ ସଂପର୍କରେ ଖବର ପାଇ ଏମଭି ୭୯ ଥାନା ପୋଲିସ ପାରିପାର୍ଶ୍ବିକ ପରିସ୍ଥିତିକୁ ନେଇ ଘଟଣାସ୍ଥଳରେ ଯାଞ୍ଚ କରୁଥିବା ବେଳେ ମୃତଦେହ ବ୍ୟବଚ୍ଛେଦ ପରେ ଘଟଣାର ସତ୍ୟାସତ୍ୟ ପଦାକୁ ଆସିପାରିବ ବୋଲି ସୂଚନା ଦେଇଛନ୍ତି ।