ବଲାଙ୍ଗିରରେ ନିଶା କାରବାର, ଗୋଷ୍ଠି ସଂଘର୍ଷରେ ଜଣେ ଗୁରୁତର
ବଲାଙ୍ଗିର, ୨୧ ନଭେମ୍ବର - ବଲାଙ୍ଗିର ସହରର ଲକ୍ଷ୍ମୀଯୋର ଥାନା ଅନ୍ତର୍ଗତ ଆନନ୍ଦ ନଗର ଅଞ୍ଚଳରେ ଗୋଷ୍ଠୀ ସଂଘର୍ଷରେ ଜଣେ ଯୁବକ ଗୁରୁତର ହୋଇଛନ୍ତି । ଗୁରୁତର ଯୁବକ ବଲାଙ୍ଗିର ଟାଉନ ଥାନା ଶାସ୍ତ୍ରୀ ନଗରର ଭାସ୍କର ପରିଚ୍ଛା ହୋଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ଗୁରୁବାର ରାତି ପ୍ରାୟ ୯ଟା ୩୦ରେ ଦୁଇ ଗୋଷ୍ଠୀ ମଧ୍ୟରେ କୌଣସି କାରଣରୁ ମାର୍ପିଟ ହୋଇଥିଲା । ଗୋଟିଏ ଗୋଷ୍ଠୀର ଆକ୍ରମଣରେ ଭାସ୍କର ଗୁରୁତର ହୋଇଥିଲେ ହେଁ ମାରଣାସ୍ତ୍ରରେ ତାଙ୍କ ଉପରେ ଆକ୍ରମଣ ହୋଇଥିବା ଜଣାପଡ଼ିଛି । ଆକ୍ରମଣକାରୀ ଆକ୍ରମଣରେ ଏକ ସ୍କୁଟି ଭାଙ୍ଗିରୁଜି ଯାଇଥିବା ଦେଖିବାକୁ ମିଳିଛି । ବଲାଙ୍ଗିର ଟାଉନ ଥାନା ପିସିଆର୍ ଭ୍ୟାନ୍ ଭାସ୍କରଙ୍କୁ ଉଦ୍ଧାର କରି ଭୀମ ଭୋଇ ମେଡିକାଲ କଲେଜ ଚିକିତ୍ସାଳୟରେ ଭର୍ତ୍ତି କରିଛି । ସହର ମଧ୍ୟରେ ବେଆଇନ ନିଶା କାରବାରକୁ ନେଇ ଗୋଷ୍ଠୀ ସଂଘର୍ଷ ଘଟିଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି । ଲକ୍ଷ୍ମୀଯୋର ଥାନା ଅଧିକାରୀ ଶୁଭରାଜ ଧରୁଆ ତଦନ୍ତ କରୁଛନ୍ତି । ତଦନ୍ତ ଜାରି ରହିଥିବାରୁ ତଦନ୍ତ ପରେ ସମ୍ପୂର୍ଣ ସୂଚନା ଦିଆଯିବ ବୋଲି ବଲାଙ୍ଗିର ଏସଡିପିଓ ସରୋଜ ଉପାଧ୍ୟାୟ ସୂଚନା ଦେଇଛନ୍ତି । ସହରରେ ବଢ଼ି ଚାଲିଥିବା ନିଶା କାରବାର ନିୟନ୍ତ୍ରଣ ପାଇଁ ପୁଲିସ ପକ୍ଷରୁ ଆଖିଦୃଶିଆ ପଦକ୍ଷେପ ଗ୍ରହଣ କରିବାକୁ ସହରବାସୀ ଦାବି କରିଛନ୍ତି ।
ପ୍ରକାଶ ଯେ, ବଲାଙ୍ଗିର ସହର ଭିତରେ ବେଆଇନ ନିଶା କାରବାର ବୃଦ୍ଧି ପାଇବାରେ ଲାଗିଛି । ଗଞ୍ଜେଇ ଓ କଫସିରପ ସହ ଚୋରାମଦ କାରବାର ବଢୁଛି। ଚା ପାନ ଦୋକାନରେ ମାଦକ ଦ୍ରବ୍ୟ ଉପଲବ୍ଧ ହେଉଥିବାରୁ ଯୁବଗୋଷ୍ଠି ନିଶାଗ୍ରସ୍ତ ହେଉଛନ୍ତି । ଅପରାଧୀଙ୍କୁ କାବୁ କରିବାରେ ପୁଲିସ ବିଫଳ ହେଉଛି ।
