Satkosia Tiger Project: ସାତକୋଶିଆରେ ଏକମାତ୍ର ମହାବଳ ବାଘୁଣୀର ଖୋଜ୍ ଖବର ନାହିଁ
କୋଟି କୋଟି ଟଂକା ବ୍ୟୟ ସତ୍ତ୍ବେ ବାଘ ସୁରକ୍ଷାରେ ବନ ବିଭାଗ ବିଫଳ
ଶିକାରୀ ଗୁଳିରେ ବାଘୁଣୀ ଶିକାର ହୋଇଥିବା ସନ୍ଦେହ ବନ ବିଭାଗ ବାଘୁଣୀ ସଂପର୍କରେ ସୂଚନା ଦେବାକୁ ଦାବୀ
ANGUL(FMNews):ସମଗ୍ର ଦେଶରେ ୫୪ ଟି ବ୍ଯାଘ୍ର ସଂରକ୍ଷଣ ଅଂଚଳ ମଧ୍ୟରୁସାତକୋଶିଆ ଅନ୍ଯତମ । ସବୁ ବ୍ଯାଘ୍ର ସଂରକ୍ଷଣ ଅଂଚଳରେ ବାଘ ସଂଖ୍ଯା ବୃଦ୍ଧି ପାଉଥିବା ବେଳେ ସାତକୋଶିଆରେ ବାଘ ଶୂନ୍ଯ ହେବା ସମସ୍ତ ଜଂଗଲ ଏବଂ ବନ୍ଯଜନ୍ତୁ ପ୍ରେମୀଂକୁ ମର୍ମାହତ କରିଅଛି । ଏପରିକି ଏକମାତ୍ର ବାଘୁଣୀର ଖୋଜ ଖବର ବନ ବିଭାଗ ପାଖରେ ନ ଥିବା ସଂରକ୍ଷଣ ଓ ପରିଚାଳନାରେ ପ୍ରଶ୍ନ ବାଚୀ ସୃଷ୍ଟି ହୋଇଛି । ବାଘ ପାଇଁ ଉଭୟ କେନ୍ଦ୍ର ଓ ରାଜ୍ଯ ସରକାର କୋଟି କୋଟି ଟଂକା ଖର୍ଚ୍ଚ କରୁଥିବା ବେଳେ ବନ ବିଭାଗ କାର୍ଯ୍ଯଧାରାରେ ଉତ୍ତର ଦାୟିତ୍ବ ନ ଥିବା ମନେ ହେଉଛି । ବାଘ ସୁରକ୍ଷା ନେଇ ସାତକୋଶିଆ ବନଖଣ୍ଡରେ ୪ ଶହରୁ ଅଧିକ ଅସ୍ଥାୟୀ କର୍ମଚାରୀ, ପାରା ମିଲିଟାରୀ ନିୟୋଜନ ହୋଇଛନ୍ତି । ମାଳମାଳ ଗାଡି ମଟର ଯୋଗାଇ ଦିଆଯାଇଅଛି । ଶହଶହ ସଂଖ୍ଯାରେ କ୍ଯାମେରା ଓ ଅନ୍ଯାନ୍ଯ ଯନ୍ତ୍ରପାତି ସରକାରୀ ଭାବେ ବ୍ଯବହାର କରାଯାଉଅଛି ମାତ୍ର ଏକ ମାତ୍ର ଜଂଗଲୀ ବାଘୁଣୀର ଖୋଜ୍ ଖବର ବନ ବିଭାଗ ପାଖରେ ନାହିଁ । ପ୍ରତିବର୍ଷ ବାଘ ସର୍ବେକ୍ଷଣ କାର୍ଯ୍ଯ , ପକ୍ଷୀ ଗଣନା, କୁମ୍ଭୀର ଗଣନା କାର୍ଯ୍ଯ ବନଖଣ୍ଡରେ ଚାଲୁ ରହିଅଛି । ଦିନରାତି କ୍ଷେତ୍ର କର୍ମଚାରୀ ଜଂଗଲରେ ପହରା ଦେଉଛନ୍ତି । ବନ୍ଯଜନ୍ତୁଂକର ଗତିବିଧି ଅନୁଧ୍ଯାନ ମୂଳକ ପ୍ରତିଦିନ ରିପୋର୍ଟ ପ୍ରଦାନ କରୁଅଛନ୍ତି । ଜଂଗଲରେ ଶହଶହ କ୍ଯାମେରା ଖଂଜା ଯାଇଅଛି , ମାଳମା଼ଳ ଗାଡି ବ୍ଯବହାର ହେଉଛି , ଜଂଗଲ ଭିତରେ ଘାସଚାଷ ଓ ବନ୍ଯଜନ୍ତୁଂକ ଆବାସସ୍ଥଳୀ ବିକାଶ କାର୍ଯ୍ଯ ଚାଲିଛି, ପ୍ରତି ଗାଁ ଓ ସାହିରେ ବନ ସୁରକ୍ଷା ସମିତି ଓ ଇକୋ ଡେଭଲୋପମେଂଟ୍ କମିଟି ରହିଛି ମାତ୍ର ଏକ ମାତ୍ର ବାଘୁଣୀର ଖବର ବନ ବିଭାଗ ପାଖରେ ନାହିଁ । ଅନ୍ଯ ପକ୍ଷରେ ବାଘୁଣୀଟି ଶିକାରୀ ଗୁଳିରେ ମୃତ୍ୟୁ ବରଣ କରିଥିବା ସନ୍ଦେହ ସୃଷ୍ଟି ହୋଇଛି ।
ବନ ବିଭାଗ ଜାଣିଶୁଣି ବଦନାମ ହେବା ଭୟରେ ଘଟଣାଟିକୁ ଲୁଚାଇବାକୁ ଚେଷ୍ଟା କରିଥିବା ଦୃଢ ଅଭିଯୋଗ ହେଉଛି । ଏକମାତ୍ର ବାଘୁଣୀର ଗତିବିଧିକୁ ଅନୁଧ୍ଯାନ କରି ସୁରକ୍ଷା ଦେଇ ପାରିନଥିବା ବନ ବିଭାଗ ୧୬ ବାଘ ଆଣି ସାତକୋଶିଆରେ ଛାଡି ବାର ଯୋଜନା ସୁରକ୍ଷା ଓ ପରିଚାଳନା ପ୍ରତି ଆଂଗୁଳି ନିର୍ଦ୍ଦେଶ କରୁଛି । ଅନ୍ଯପକ୍ଷରେ ଗତ ୫ ବର୍ଷ ମଧ୍ଯରେ ସାତକୋଶିଆ ବନଖଣ୍ଡରେ ୨୫ ଟି ହାତୀ ମୃତ୍ଯୁବରଣ କରିଥିବା ସହିତ ୧୦ ରୁ ଅଧିକ କଲରାପତିଆ ବାଘ ଶିକାର ହୋଇଥିବା ଜଣାଯାଇଅଛି ।
ସାତକୋଶିଆରେ ବାଘୁଣୀର ନାହିଁ ଖୋଜ ଖବର । No trace Of Tigress In #Satkosia pic.twitter.com/tG9FbewRPJ
Fast Mail News (@FastMailNews) December 24, 2024
ଅନ୍ୟ ବନ୍ୟଜନ୍ତୁମାନଙ୍କ ମଧ୍ୟରେଗୟଳ, ହରିଣ, କୁଟୁରା, ବାରହା, ଗୁରୁଣ୍ଡି ପ୍ରଭୁତି ଜୀବ ଶିକାର ହେଉଥିବା ଏକ ନିତିଦିନିଆ ଘଟଣା ଅଟେ । ବନ୍ୟଜନ୍ତୁଶିକାର ଘଟଣାକୁ ବନ ବିଭାଗ ପକ୍ଷରୁ ସଠିକ୍ ତଦନ୍ତ କରାଯାଉ ନାହିଁ । ଏପରିକି ଶିକାର ଓ ଅନ୍ୟାନ୍ୟ ଜଙ୍ଗଲ ଅପରାଧିକ ଘଟଣାକୁ ସୂଚନା ଦିଆଯାଉଥିଲେ ମଧ୍ୟ ବନ ବିଭାଗ ଘଟଣାକୁ ତଦନ୍ତ କରି ଶିକାରୀ ଧରିବା ପରିବର୍ତ୍ତେ ଅପରାଧ ଘଟଣାକୁ ଲୁଚାଯାଉଅଛି । ଯାହା ଫଳରେ କୋର୍ଟରେ ଆସାମୀ ଖଲାସ ହେବାର ଅଧିକ ସମ୍ଭାବନା ରହୁଅଛି । ଗତ ୨୦୧୮ ବର୍ଷ ସାତକୋଶିଆକୁ ଅଣ୍ଡିରା ମହାବଳ ବାଘ ମହାବୀରକୁ କାହ୍ନା ବ୍ୟାଘ୍ର ପ୍ରକଳ୍ପରୁ ଅଣାଯାଇଥିଲା । ଏହି ମହାବୀର ବାଘଟି ଶିକାରୀ ଫାଶରେ ପଡ଼ି ମୃତ୍ୟୁ ବରଣ କରିଥିଲା । ରେଡ଼ିଓ କୋଲାର ଥିଲେ ମଧ୍ୟ ମୃତ୍ୟୁର ୨ ଦିନ ପରେ ବନ ବିଭାଗ ସୁରାକ ପାଇଥିଲା । ଏପରିକି ବାଘର ମୃତ୍ୟୁ ତଦନ୍ତ କାର୍ଯ୍ୟଟି ବନ ବିଭାଗ ପକ୍ଷରୁ କରାଯାଇ ପାରିଲା ନାହିଁ । ଶିକାରୀ ଫାଶରେ ମହାବୀର ଶିକାର ହୋଇ ଯାଇଥିଲେ ସୁଦ୍ଧା ଆଜି ଯାଏ ମହାବୀରର ଶିକାରୀ କିଏ ବନ ବିଭାଗ ଧରି ପାରିଲା ନାହିଁ । ଦୀର୍ଘ ୬ ବର୍ଷ ପରେ ମଧ୍ୟ ବନ ବିଭାଗ ମହାବୀରର ତଦନ୍ତ ପୂର୍ଣ୍ଣାଙ୍ଗ କରି ପାରିଲା ନାହିଁ ।
ସାତକୋଶିଆ ବନଖଣ୍ଡରେ ପ୍ରତିଦିନ ଶିକାରୀ ମାନଙ୍କ ଦ୍ଵାରା ବନ୍ୟଜନ୍ତୁ ଶିକାର ଘଟୁଥିଲେ ମଧ୍ୟ ବନ ବିଭାଗ ଘଟଣା ଗୁଡ଼ିକୁ ଚପାଇ ଦେଉଅଛି । ଶିକାରୀ ମାନଙ୍କ ସହିତ ଅସାଧୁ ସମ୍ପର୍କ ଥିବାରୁ ଶିକାର ଘଟଣାରେ ବୃଥା ଦୋଷ ଗ୍ରାମବାସୀଙ୍କୁ ଦିଆଯାଉଅଛି । ମହାବୀର ବାଘର ମୃତ୍ୟୁ ରହସ୍ୟ ଖୋଦ୍ ବନ ବିଭାଗ ଦ୍ବାରା ଲୁଚାଯାଉଥିବା ଦୃଢ଼ ଅଭିଯୋଗ ହେଉଛି ।ମହାବୀର ବାଘକୁ ଶିକାରୀ ମାନେ ଫାଶରେ ଶିକାର କରିଥିବା ଏବଂ ବନ ବିଭାଗ ଶିକାରୀଙ୍କୁ ଧରି ପାରି ନ ଥିବା କାରଣରୁ ଶିକାରୀ ମାନଙ୍କ ମନୋବଳ ବୃଦ୍ଧି ପାଇଅଛି । ଏପରିକି ଶିକାରୀମାନେ ମହାବଳ ଜଙ୍ଗଲି ବାଘୁଣିକୁ ଶିକାର କରିଥିବା ସନ୍ଦେହ ଦୃଢ଼ୀଭୂତ ହେଉଛି । ଅନ୍ୟ ପକ୍ଷରେ ବନ ବିଭାଗ ବଦନାମ ହେବାରୁ ଏଡ଼ାଇବା ପାଇଁ ଘଟଣାକୁ ତଦନ୍ତ ପରିବର୍ତ୍ତେ ଲୁଚାଇଥିବା ଅଭିଯୋଗ ହେଉଛି । ବାଘ, ହାତୀ, କୁମ୍ଭୀର ସମେତ ବିରଳ ବନ୍ୟଜନ୍ତୁଙ୍କ ଶିକାର ଘଟଣାକୁ ବନ ବିଭାଗ ଲୁଚାଇବା ଏକ ସାଧାରଣ ଘଟଣା ବୋଲି ସାତକୋଶିଆ ଅଭୟାରଣ୍ୟ ପ୍ରଜା ସୁରକ୍ଷା ସମିତିର ସଭାପତି ନବ କିଶୋର ବିଶୋଇ ପ୍ରକାଶ କରିଅଛନ୍ତି ।
ଜିଲିଣ୍ଡା ରେଞ୍ଜର ଏକ ଦନ୍ତା ହାତୀର ଶବକୁ ବନ ବିଭାଗର ରେଞ୍ଜର, ଫରେଷ୍ଟର ମିଳିମିଶି ଏକ ଗର୍ତ୍ତରେ ପୋତି ଦେଇ ଲୁଚାଇଥିଲେ । ସେତେବେଳେ ସାତକୋଶିଆ ବନଖଣ୍ଡରେ ଏସି.ଏଫ ବର୍ତ୍ତମାନର ଡିଏଫଓ ଜିଲିଣ୍ଡା ରେଞ୍ଜର ପରିଚାଳନାରେ ଥିଲେ । ଏସିଏଫ ନିଜର ସୁରକ୍ଷା ନେଇ ରେଞ୍ଜର ଓ ଫରେଷ୍ଟର ଙ୍କୁ ନିଲମ୍ବନ କରି କେସ ରୁଜୁ କରିଥିଲେ । ହାତୀ ଲୁଚାଇବା ଘଟଣାରେ ଏସି.ଏଫ ସଂପୃକ୍ତି ଥିବା ଶ୍ରୀ ବିଶୋଇ ଦୃଢ଼ ଅଭିଯୋଗ କରିଛନ୍ତି । ଏପରିକି ସାତକୋଶିଆର ବାଘୁଣୀକୁ ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶରେ ଶିକାର ଘଟଣାକୁ ଲୁଚାଯାଇଥିବାକୁ ଅସ୍ବୀକାର କରାଯାଇ ପାରିବ ନାହିଁ ବୋଲି ଶ୍ରୀ ବିଶୋଇ ଦୃଢ଼ୋକ୍ତି ପ୍ରକାଶ କରିଛନ୍ତି ।
