ଖୋର୍ଦ୍ଧାରେ ପତାକା ଉତ୍ତୋଳନ କଲେ ପ୍ରଭାତି ପରିଡା

ଭୁବନେଶ୍ୱର, 26 ଜାନୁଆରି ଐତିହାସିକ ବୀର ପ୍ରସବା ଖୋର୍ଦ୍ଧା ମାଟିରେ ରେ ୭୬ତମ ସାଧାରଣତନ୍ତ୍ର ଦିବସ ସମାରୋହରେ ଯୋଗଦେଇ ଜାତୀୟ ପତାକା ଉତ୍ତୋଳନ କରିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତି ପରିଡା । ଏହି ଅବସରରେ ପ୍ରଭାତି ପରିଡା କହିଛନ୍ତି ଯେ, ୧୯୫୦ ମସିହା ଜାନୁୟାରୀ ୨୬ ତାରିଖ ଆମ ସମସ୍ତଙ୍କ ପାଇଁ ଏକ ସ୍ମରଣୀୟ ଦିବସ ।

ଏହା କେବଳ ଏକ ଉତ୍ସବ ନୁହେଁ ବରଂ ଗଣତନ୍ତ୍ର ଏବଂ ସମ୍ବିଧାନର ସୁରକ୍ଷା ଆମ ସମସ୍ତଙ୍କର ଦାୟିତ୍ୱ ଏବଂ କର୍ତ୍ତବ୍ୟ ବୋଲି ହୃଦୟଙ୍ଗମ କରିବାର ଦିନ। ଭାରତ ସାଧାରଣତନ୍ତ୍ର ରାଷ୍ଟ୍ର ହେବାରେ ଇତିମଧ୍ୟରେ ୭୫ ବର୍ଷ ବିତି ଯାଇଛି । ଆମ ଦେଶ ଆଜି ବିଶ୍ଵର ସର୍ବବୃହତ ଗଣତାନ୍ତ୍ରିକ ରାଷ୍ଟ୍ରଭାବେ ମାନ୍ୟତା ପାଇଛି । ଆମ ସମ୍ବିଧାନ ପୃଥିବୀର ସର୍ବବୃହତ୍ ଲିଖିତ ସମ୍ବିଧାନ । ଭାରତ କଳା, ସାହିତ୍ୟ, ସଂସ୍କୃତି, ଅର୍ଥନୀତି, ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ଉତ୍କର୍ଷତା ଲାଭ କରିଛି ।

ବିଶ୍ଵର ଅନ୍ୟତମ ଶକ୍ତିଶାଳୀ ଓ ବିକାଶଶୀଳ ରାଷ୍ଟ୍ର ରୂପେ ନିଜକୁ ପରିଗଣିତ କରିପାରିଛି। ଆମ ରାଜ୍ୟ ଓଡ଼ିଶା ମଧ୍ୟ ପ୍ରଗତି ପଥରେ ଆଗେଇ ଚାଲିଛି । ୨୦୩୬ ସୁଧା ଉତ୍କର୍ଷ ଓଡିଶା ଗଠନ କରିବାର ଲକ୍ଷ୍ୟରେ ଆମ ସରକାର କାର୍ଯ୍ୟରତ । ଯଶସ୍ଵୀ ପ୍ରଧାନମନ୍ତ୍ରୀ, ଶ୍ରୀ ନରେନ୍ଦ୍ର ମୋଦିଜି ଙ୍କ ଆହ୍ଵାନ କ୍ରମେ ୨୦୪୭ ସୁଧା ବିକଶିତ ଭାରତର ସ୍ଵପ୍ନ ମଧ୍ୟ ପୂରଣ ହେବ ।

ଗ୍ରାମୀଣ ବିକାଶ, କୃଷିର ଉନ୍ନତି ଓ ଅର୍ଥନୈତିକ ଅଭିବୃଦ୍ଧି ପାଇଁ ରାଜ୍ୟ ସରକାର ନିରନ୍ତର ପ୍ରୟାସ ଜାରି ରଖୁଛନ୍ତି । ମହିଳାମାନଙ୍କର ଉନ୍ନତି ଓ ଅର୍ଥନୈତିକ ବିକାଶ ପାଇଁ ସୁଭଦ୍ରା ଯୋଜନା ମାଧ୍ୟମରେ ପାଖା ପାଖି ୧ କୋଟି ମହିଳାଙ୍କୁ ସଶକ୍ତ କରାଯାଇଅଛି । କେବଳ ଖୋର୍ଦ୍ଧା ଜିଲ୍ଲାରେ ହିଁ ୩ ଲକ୍ଷ ୫୪ ହଜାର ୫୮୬ ଜଣ ମହିଳାଙ୍କୁ ସୁଭଦ୍ରା ଯୋଜନାରେ ଅନ୍ତର୍ଭୁକ୍ତ କରାଯାଇଅଛି ।