ଆଜି ବିଜେଡି ପାଳୁଛି 28ତମ ପ୍ରତିଷ୍ଠା ଦିବସ

ଭୁବନେଶ୍ୱର, 26 ଡିସେମ୍ବର:- ୨୪ ବର୍ଷର ନିରଙ୍କୁଶ କ୍ଷମତା ହାତରୁ ଯିବା ପରେ ପ୍ରଥମ ଥର ବିନା କ୍ଷମତାରେ ଥିବା ବିଜେଡି ଆଜି ପାଳନ କରୁଛି ନିଜର ୨୮ତମ ପ୍ରତିଷ୍ଠା । ପ୍ରତି ନିର୍ବାଚନ ମଣ୍ଡଳୀରେ ଆଡମ୍ବର ସହ ପାଳନ ହେବ ପ୍ରତିଷ୍ଠା ଦିବସ । ନିଜେ ନବୀନ ଶଙ୍ଖଭବନରେ ହେବାକୁ ଥିବା ମୁଖ୍ୟ କାର୍ଯ୍ୟକ୍ରମରେ ନେତା ଓ କର୍ମୀଙ୍କୁ ଉଦବୋଧନ ଦେବାର କାର୍ଯ୍ୟକ୍ରମ ରହିଛି । ତେବେ ନିର୍ବାଚନୀ ବିପର୍ଯ୍ୟୟ ପରଠୁ ଗୋଷ୍ଠୀ କନ୍ଦଳରୁ ବିଜେଡ଼ିରେ ଫାଳ ଫାଳ ସ୍ଥିତି । ସମାନ୍ତରାଳ ସଂଗଠନ ସାଙ୍ଗକୁ ଦଳ ଭିତରେ ବିବାଦ ଅନେକ । ନେତା ନେତାଙ୍କ ଭିତରେ ପଡୁନି । ଅନେକ ଆଗ ଧାଡ଼ିର ତୁଙ୍ଗ ନେତା ଙ୍କ ଠୁ ନେଇ ତୃଣ ମୂଳ ସ୍ତର ପର୍ଯ୍ୟନ୍ତ ନେତାମାନେ ଜଣେ ପରେ ଜଣେ ଦଳ ଛାଡ଼ୁଛନ୍ତି । ଯେଉଁଥିପାଇଁ ଖୋଦ୍ ବିଜେଡି ସୁପ୍ରିମୋ ନବୀନ ପଟ୍ଟନାୟକ ନଭେମ୍ବରରେ ହେବାକୁ ଥିବା ଜିଲ୍ଲାଗସ୍ତ କାର୍ଯ୍ୟକ୍ରମକୁ ସ୍ଥଗିତ ରଖିଛନ୍ତି । ୨୪ ନିର୍ବାଚନରେ ପାଣ୍ଡିଆନଙ୍କ ସମାନ୍ତରଳ ସଙ୍ଗଠନ ଫର୍ମୁଲା ଓ ସାମ୍ନାରୁ ଦଳର କମାଣ୍ଡ ଧରିବା ଓ ବ୍ୟୁରୋକ୍ରାଶି ଶାସନ ପ୍ରସଙ୍ଗ ପାଇଁ ବିଜେଡି ମାଟି କାମୁଡି ପଡ଼ିଛି । ପୂର୍ବ ତ୍ରୁଟିକୁ ସୁଧାରି କର୍ମୀଙ୍କୁ ନୂଆ ବାର୍ତ୍ତା ଦେବାକୁ ନବୀନ ଏବେ ନିଜେ ବାହାରକୁ ବାହାରିଲେଣି । ହେଲେ ବୟସାଧିକ କାରଣରୁ ତାହା ଅଧିକ ସମ୍ଭବ ହେଉ ନାହିଁ । ସେହିପରି ବ୍ଲକ ଓ ପଞ୍ଚାୟତ ହାତରୁ ଧୀରେ ଧୀରେ ଖସିବା ଦେଖି ଲଗାତାର ନବୀନ ନିବାସ ରେ କର୍ମୀ ଙ୍କୁ ଭେଟୁଛନ୍ତି ନବୀନ ।ଏତେସବୁ ପରେ ବି ନବୀନ ବର୍ତ୍ତମାନ ସୁଦ୍ଧା ରାଜ୍ୟ କମିଟି ଗଠନ କରିବାରେ ସକ୍ଷମ ହୋଇନାହାନ୍ତି । ସଭ୍ୟ ସଂଗ୍ରହ ଅଭିଯାନ ଓ ଜନସମ୍ପର୍କ ପଦଯାତ୍ରାରେ ବି ସେଭଳି ସଫଳତା ପାଇନି ଦଳ । ଦେଖିବାକୁ ଗଲେ ଦଳୀୟ ସଂଗଠନ ଯେମିତି ବିକ୍ଷିପ୍ତ ଅବସ୍ଥାରେ ରହିଛି । ତେଣୁ ନବୀନ ଏଥର ଆଶା ରଖିଛନ୍ତି ୨୮ତମ ପ୍ରତିଷ୍ଠା ଦିବସକୁ ପ୍ରଭାବୀ ଢଙ୍ଗରେ ପାଳନ କରି ଟିମ୍ କୁ ଏକଜୁଟ କରିବେ ।