ଇଡି କୋର୍ଟ ସ୍ଥାନାନ୍ତର ନକରିବା ପ୍ରତିବାଦରେ ମିଳିତ ବୈଠକ : ସରକାରଙ୍କ କାନରେ ପ୍ରତିବାଦର ସ୍ବର ବାଜୁ - ବ୍ରଜ

ପୁରୀ, ୧୯ ଅପ୍ରେଲ - ପୁରୀ କୋର୍ଟ ସ୍ଥାନାନ୍ତର ପ୍ରତିବାଦରେ ଆଜି ପୁରୀ ବାର ଆସୋସିଏସନ ସଭାଗୃହରେ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା । ଏଥିରେ ସଂଘର ସଭାପତି ପ୍ରେମାନନ୍ଦ ମହାନ୍ତି ଅଧ୍ୟକ୍ଷତା କରିଥିବା ବେଳେ ସାଧାରଣ ସମ୍ପାଦକ ଶରତ ରାୟଗୁରୁ ଏଜେଣ୍ଡା ସମ୍ପର୍କରେ ଆଲୋକପାତ କରିଥିଲେ । କୋର୍ଟ ନଉଠିବା ପାଇଁ ଆନ୍ଦୋଳନକୁ ଜୋରଦାର କଲେ ସରକାରଙ୍କ କାନରେ ପ୍ରତିବାଦର ସ୍ୱର ବାଜିବ ବୋଲି ପୂର୍ବତନ କେନ୍ଦ୍ରମନ୍ତ୍ରୀ ବ୍ରଜକିଶୋର ତ୍ରିପାଠୀ ମତ ଦେଇଥିଲେ । ପ୍ରତିବାଦ ସ୍ୱରୂପ ଆଇନଜୀବୀଙ୍କ ସହ ବିଭିନ୍ନ ଦଳର ନେତୃବୃନ୍ଦ, ବିଭିନ୍ନ ସାହିର ମୁରବି ଓ ସାମାଜିକ ଅନୁଷ୍ଠାନର କର୍ମକର୍ତ୍ତାଙ୍କ ସହ ମିଶି ଶାନ୍ତିପୂର୍ଣ୍ଣ ଉପାୟରେ ଶୋଭାଯାତ୍ରା ଓ ସାଧାରଣ ସଭା କରିବା ପାଇଁ ନିଷ୍ପତ୍ତି ନିଆଯାଇଥିଲା । ଆନ୍ଦୋଳନର ରୂପରେଖକୁ ତ୍ବରାନ୍ବିତ କରିବା ପାଇଁ ମିଳିତ କ୍ରିୟାନୁଷ୍ଠାନ କମିଟି ଗଠନ କରାଯିବ । ମୁଖ୍ଯମନ୍ତ୍ରୀ, ଉଚ୍ଚ ନ୍ୟାୟାଳୟର ବିଚାରପତିଙ୍କ ସହ ମଧ୍ଯ ଆଲୋଚନା କରାଯିବା ପାଇଁ ନିଷ୍ପତି ହୋଇଥିଲା । ପୂର୍ବତନ ବିଧାୟକ ଉମାବଲ୍ଲଭ ରଥ କହିଲେ, ଏହି କୋର୍ଟ ସ୍ଥାନଟିକୁ କେଉଁ ମୁଷ୍ଟିମୟ କମ୍ପାନୀକୁ ଦେବେ ତାହା ଆଗରୁ ସ୍ଥିର କରି କୋର୍ଟ ଉଠାଇବା ନିଷ୍ପତି ସରକାର ନେଇଛନ୍ତି । କୋର୍ଟ ସଂଲଗ୍ନ ସରକାରୀ କାର୍ଯ୍ଯାଳୟ ଓ ବସ ଭବନକୁ ମିଶାଇ ଦେଲେ ପାଞ୍ଚ ଏକର ଜାଗା ହେବ । ପୁରୀର ଐତିହ୍ଯକୁ ଧ୍ବଂସ କରିବା ପାଇଁ ଏହା ଏକ ଅନ୍ତର୍ଜାତିୟ ଷଡଯନ୍ତ୍ର ବୋଲି କହିଥିଲେ । ପୂର୍ବତନ ବିଧାୟକ ଜୟନ୍ତ କୁମାର ଷଡଙ୍ଗୀ ଏ ସମ୍ପର୍କରେ ମୁଖ୍ଯମନ୍ତ୍ରୀଙ୍କ ସହ ଆଲୋଚନା କରିବା ପାଇଁ ପରାମର୍ଶ ଦେଇଥିଲେ । ପୁରୀ ବିଧାୟକ ସୁନିଲ କୁମାର ମହାନ୍ତି ଆନ୍ଦୋଳନକୁ ସମସ୍ତ ସହଯୋଗ ଯୋଗାଇବା ସହ ବିଧାନସଭାରେ ଏହି ପ୍ରସଙ୍ଗ ଉଠାଇବେ ବୋଲି କହିଥିଲେ ।

ଏହି ପ୍ରତିବାଦ ସଭାରେ ଆଇନଜୀବୀ ତଥା ଶ୍ରୀଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ, ପୂର୍ବତନ ନଗରପାଳ ସୁରେନ୍ଦ୍ରନାଥ ଦାଶ ଓ ଏ. ବିଶୁରାଓ, ସିପିଏମ ନେତା ଜଗନ୍ନାଥ ଦେଓ, ବିଶ୍ବାବସୁ ସେବକ ବିନାୟକ ଦାସମହାପାତ୍ର, ବିଜେପି ନେତା ରବିନାରାୟଣ ଦାଶ, ସେବାୟତ ରାମଚନ୍ଦ୍ର ଦାସ ମହାପାତ୍ର, ଆପ ର ନେତା ସଞ୍ଜୀବ ମହାନ୍ତି, ଉତରପାର୍ଶ୍ବ ମଠ ମଠାଧୀଶ ନାରାୟଣ ରାମାନୁଜଦାସ, ସିପିଆଇ ଏମଏଲ ନେତା ମୋହନ ନାଇଡୁ, କଂଗ୍ରେସ ନେତା ଇଂ. ରାଜେଶ ମିଶ୍ର ଯୋଗଦେଇ ଆନ୍ଦୋଳନକୁ ସମର୍ଥନ କରିଥିଲେ । ଏହା ସହ ଆଠ ସାହି ଆଖଡାର ନରେନ୍ଦ୍ର ମହାନ୍ତି, ବିଶୁନି ଜାଗାର ସଭ୍ଯ ତଥା ଆଇନଜୀବୀ ରାମଚନ୍ଦ୍ର ମହାପାତ୍ର, ପରିବର୍ତ୍ତନ ଓଡିଶାର ଅଧ୍ୟକ୍ଷ ଜିତେନ୍ଦ୍ର ମହାପାତ୍ର, ସାମ୍ବାଦିକ ବିଶ୍ବଜିତ ମିଶ୍ର ଓ ମଧୁସୂଦନ ମିଶ୍ର, ଭୂସମ୍ପତ୍ତି ସୁରକ୍ଷା ପରିଷଦର ଉପସଭାପତି ବିରେନ୍ଦ୍ର ଭୂଷଣ ହୋତା, ବିଜେଡି ନେତା ଭକ୍ତ ଚରଣ ଦାସ, ହାଇକୋର୍ଟର ବରିଷ୍ଠ ଆଇନଜୀବୀ ବିଭୁପ୍ରସାଦ ତ୍ରିପାଠୀ,ଓକିଲ ସଂଘର ପୂର୍ବତନ ସଭାପତି ପ୍ରଶାନ୍ତ ମିଶ୍ର , ବିଜୟ କୁମାର ମିଶ୍ର ଓ ଆଦିତ୍ଯ ହୃଦୟ ମିଶ୍ର ପ୍ରମୁଖ ଉପସ୍ଥିତ ରହି ଆନ୍ଦୋଳନର ରୂପରେଖକୁ ଜୋରଦାର କରିବା ପାଇଁ ମତ ଦେଇଥିଲେ । ଶେଷରେ ସଂଘର ଉପସଭାପତି ବିଭୁଦତ୍ତ ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ ।

ଏହି ସଭାରେ ଶତାଧିକ ଆଇନଜୀବୀ, ସାହି ମୁରବି, ବିଭିନ୍ନ ସଂଗଠନର କର୍ମକର୍ତ୍ତା, ବିଭିନ୍ନ ରାଜନୈତିକ ଦଳର ନେତୃବୃନ୍ଦ, ସ୍ବେଛାସେବୀ, ସାମାଜିକ କର୍ମୀ, ବୁଦ୍ଧିଜୀବୀ ଓ ସାମ୍ବାଦିକ ମାନେ ଉପସ୍ଥିତ ଥିଲେ ।