୫ମ ଜାତୀୟ ଚିଲିକା ବିହଙ୍ଗ ଉତ୍ସବ ଆଜି ଠାରୁ

ଭୁବନେଶ୍ୱର, 6 ଜାନୁଆରି : 5ମ ଜାତୀୟ ଚିଲିକା ବିହଙ୍ଗ ଉତ୍ସବ ଆଜି ଠାରୁ ୧୨ ତାରିଖ ମଧ୍ୟରେ ପାଳିିତ ହେବ ।

ପ୍ରାକୃତିକ ଐତିହ୍ୟ, ଜୈବବିବିଧତାର ସଂରକ୍ଷଣ ନିମନ୍ତେ ଓଡ଼ିଶା ପ୍ରତିବଦ୍ଧ । ଏହି ଜାତୀୟ ଚିଲିକା ବିହଙ୍ଗ ଉତ୍ସବ ଚିଲିକା ହ୍ରଦର ସୌନ୍ଦର୍ଯ୍ୟ, ଜୈବବିବିଧତା, ସୁରକ୍ଷା ଏବଂ ଗୋଷ୍ଠୀ ପରିଚାଳିତ ସଂରକ୍ଷଣର ଗରିମାମୟ ଐତିହ୍ୟକୁ ଅଧିକ ଋଦ୍ଧିମନ୍ତ କରିବା ନିମନ୍ତେ ଏକ ପ୍ରଚେଷ୍ଟା । ଉପମୁଖ୍ୟମନ୍ତ୍ରୀ, ମହିଳା ଓ ଶିଶୁ ବିକାଶ, ମିଶନ ଶକ୍ତି ଏବଂ ପର୍ଯ୍ୟଟନ ବିଭାଗ ଶ୍ରୀମତୀ ପ୍ରଭାତୀ ପରିଡ଼ା ଏହି ଜାତୀୟ ଚିଲିକା ବିହଙ୍ଗ ଉତ୍ସବରେ ମୁଖ୍ୟ ଅତିଥି ଭାବେ ଲୋକ ସେବା ଭବନର ସମ୍ମିଳନୀ କକ୍ଷରେ ଯୋଗଦାନ କରିବେ । ଜାନୁଆରୀ ୬ ତାରିଖର ଉଦ୍ଘାଟନୀ ଉତ୍ସବରେ ଆନ୍ତର୍ଜାତିକ ଖ୍ୟାତିସମ୍ପନ୍ନ ପକ୍ଷୀ ବିଶାରଦ ଡ. ଅସାଦ ରହମାନୀ ଓ ଡ. ସୁରେଶ କୁମାର ଏବଂ ଆନ୍ତର୍ଜାତିକ ଖ୍ୟାତିସମ୍ପନ୍ନ ବନ୍ୟପ୍ରାଣୀ ପଟୋଗ୍ରାଫର ଧୃତିମାନ ମୁଖାର୍ଜୀ ମଧ୍ୟ ଯୋଗ ଦେବେ ।

ପ୍ରତ୍ୟେକ ବର୍ଷ ଶୀତଋତୁରେ ଲକ୍ଷାଧିକ ପରିବ୍ରାଜକ ପକ୍ଷୀମାନଙ୍କର ଆଗମନ ଚିଲିକାର ସୌନ୍ଦର୍ଯ୍ୟକୁ ବହୁଗୁଣିତ କରିଥାଏ । ଏହି ଉତ୍ସବଟିକୁ ପ୍ରତ୍ୟେକ ବର୍ଷ ପର୍ଯ୍ୟଟନ ବିଭାଗ ଆୟୋଜନ କରିଥାଏ କିନ୍ତୁ ଏବର୍ଷ ପ୍ରବାସୀ ଭାରତୀୟ ଦିବସ ଆୟୋଜନ କରୁଥିବାରୁ ୫ମ ଜାତୀୟ ଚିଲିକା ବିହଙ୍ଗ ଉତ୍ସବର ଆୟୋଜନର ଦାୟିତ୍ୱ ଜଙ୍ଗଲ(ବନ୍ୟପ୍ରାଣୀ)ବିଭାଗକୁ ପ୍ରଦାନ କରାଯାଇଛି । ଏହି ଉତ୍ସବ ନିମନ୍ତେ କୁଇଜ୍, ପୋଷ୍ଟର, ଚିତ୍ରକଳା ପ୍ରତିଯୋଗିତା ଚିଲିକା ଓ ଭୁବନେଶ୍ୱରର ଉଚ୍ଚ ମାଧ୍ୟମିକ ଓ ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନଙ୍କ ମଧ୍ୟରେ ଅନୁଷିତ ହୋଇ ସାରିଛି । ଉଦ୍ଘାଟନୀ ଉତ୍ସବରେ ସେମାନଙ୍କୁ ପୁରସ୍କୃତ କରାଯିବ । ପୂର୍ବରୁ ପଞ୍ଜୀକରଣ କରିଥିବା ୬୦ ଜଣ ଫଟୋଗ୍ରାଫର ୬ରୁ ୮ ତାରିଖ ପର୍ଯ୍ୟନ୍ତ ନଳବଣ ଓ ମଙ୍ଗଳାଯୋଡ଼ିରେ ପକ୍ଷୀମାନଙ୍କୁ ଦେଖି ଫଟୋଗ୍ରାଫି କରିବାର ସୁଯୋଗ ପାଇବେ । ଉତ୍ସବରେ ପକ୍ଷୀ ଚିତ୍ରପ୍ରଦର୍ଶନ, ବିକେ ଆର୍ଟସ୍, କଳିଙ୍ଗ, ଧଉଳି, ଖଲ୍ଲିକୋଟ ମହାବିଦ୍ୟାଳୟ ଓ ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ପ୍ରତ୍ୟକ୍ଷ ଚିତ୍ରକଳା ଏବଂ ପୋଷ୍ଟର ପ୍ରଦର୍ଶନ ଆକର୍ଷଣର କେନ୍ଦ୍ରବିନ୍ଦୁ ହେବ । ଏହି ଉତ୍ସବରେ ଗ୍ରାମବାସୀ, ଓଡ଼ିଶାର ବନ୍ୟପ୍ରାଣୀ ଫଟୋଗ୍ରାଫରଗଣ ଓ ସ୍କୁଲ ଛାତ୍ରଛାତ୍ରୀମାନେ ଯୋଗ ଦେବେ । ଏହା ସହିତ ଜାନୁଆରୀ ୭ ତାରିଖରୁ ୧୨ ତାରିଖ ପର୍ଯ୍ୟନ୍ତ ଛଦିନ ଧରି ଦିନ ୧୦.୩୦ରୁ ୧୨.୩୦ ମଧ୍ୟରେ ବନ୍ୟପ୍ରାଣୀ ଡକୁମେଣ୍ଟାରୀ ଚଳଚିତ୍ର, ଫଟୋ ପ୍ରଦର୍ଶନ ଓ ଚିତ୍ରକଳା ପ୍ରଦର୍ଶନୀ ଆଞ୍ଚଳିକ ବିଜ୍ଞାନ ସଂଗ୍ରହାଳୟଠାରେ ସ୍କୁଲ ଛାତ୍ରଛାତ୍ରୀମାନଙ୍କୁ ନେଇ ଅନୁଷ୍ଠିତ ହେବ । ଏହି ଉତ୍ସବ ମଧ୍ୟରେ ଜାନୁଆରୀ ୮ ତାରିଖରୁ ୧୦ ତାରିଖ ପର୍ଯ୍ୟନ୍ତ ଯଥାକ୍ରମେ ଫରେଷ୍ଟପାର୍କ, ଆଞ୍ଚଳିକ ଉଦ୍ଭିଦ ଗବେଷଣା କେନ୍ଦ୍ର ଓ ଆନନ୍ଦବନଠାରେ ସକାଳ ୭ ଘଟିକାରୁ ୮.୩୦ ପର୍ଯ୍ୟନ୍ତ ପକ୍ଷୀ ନିରୀକ୍ଷଣ ପଦଯାତ୍ରା ଅନୁଷ୍ଠିତ ହେବ । ଏହା ଛଡା ୧୦ ତାରିଖ ରାତିରୁ ୧୧ ତାରିଖ ଯାଏଁ ଓଡ଼ିଶା ବାର୍ଡ କନ୍କ୍ଲେଭ, ଚିଲିକାର ବରକୁଳଠାରେ ଅନୁଷ୍ଠିତ ହେବାକୁ ଯାଉଛି । ସେଠାରେ ମଧ୍ୟ ଓଡ଼ିଶାର ପକ୍ଷୀ ନିରୀକ୍ଷକ ଓ ଗବେଷକମାନେ ଆଲୋଚନା କରିବେ ଓ ନଳବଣ ବୁଲିବା ପାଇଁ ଯିବେ ।