ଶିମିଳିପାଳରେ ଲାଗିଛି ଶହେଟି ଏଆଇ କ୍ୟାମେରା - ନିକଟ ଅତୀତରେ ଶିମିଳିପାଳରେ 3 ମହାବଳର ମୃତ୍ୟୁ

ଭୁବନେଶ୍ୱର- ଶିମିଳିପାଳରେ ମହାବଳ ମୃତ୍ୟୁ ପ୍ରସଙ୍ଗରେ ବନ୍ୟପ୍ରାଣୀ ପିସିସିଏଫ ପ୍ରତିକ୍ରିୟା ରଖିଛନ୍ତି । ନିକଟ ଅତୀତରେ ଶିମିଳିପାଳରେ ୩ଟି ମହାବଳର ମୃତ୍ୟୁ ହୋଇଛି । ୨୦୨୩ ଏପ୍ରିଲ ୩୦ ରେ ଦୁଇଟି ବାଘ ମଧ୍ୟରେ ଲଢେଇ କାରଣରୁ ଗୋଟିଏ ମହାବଳର ମୃତ୍ୟୁ ହୋଇଥିଲା । ୨୦୨୪ ଫେବ୍ରୁଆରୀ ୬ରେ ଲିଭର୍ ଇନଫେକ୍ସନ୍ ଯୋଗୁଁ ଗୋଟିଏ ମହାବଳ ବାଘର ମୃତ୍ୟୁ ହୋଇଥିଲା । ଉଭୟ ମହାବଳର ପୋଷ୍ଟମର୍ଟମ୍ ରିପୋର୍ଟ ରହିଛି । ତୃତୀୟଟି ହେଉଛି ଏକ କଳା ମହାବଳ ଶାବକ । ମାଆଠୁ ଅଲଗା ଥିବାରୁ ଅନ୍ୟ ବନ୍ୟଜନ୍ତୁ ଶିକାର ପାଇଁ ଯାଇଥିବା ଶିକାରୀଙ୍କ ଶିକାର ହୋଇଥିଲା ଏହି କଳା ବାଘ ଶାବକଟି । ଏହି ଘଟଣା ପ୍ରାୟ ୨ ମାସ ତଳେ ଘଟିଥିବା ଜଣାପଡ଼ୁଛି । ଯେତେବେଳେ ବନ ବିଭାଗ ଟିମ ଯମୁନା ଓ ଜିନତକୁ ନେଇ ବ୍ୟସ୍ତ ଥିଲେ, ଶିକାରୀ ମାନେ ଏହାର ସୁଯୋଗ ନେଇଥିବା ଅନୁମାନ କରାଯାଉଛି । ଏହି ଘଟଣାରେ ୧୦ ଜଣ ଗିରଫ ହୋଇଥିବା ବେଳେ ୬ଟି ବନ୍ଧୁକ ଜବତ ହୋଇଛି । ଜଣେ ଅଭିଯୁକ୍ତ ଫେରାର ଅଛି । AI କ୍ୟାମେରାରେ ମିଳିଥିବା ଫଟୋ ସହାୟତାରେ ଶିକାରୀ ପାଖରେ ପହଞ୍ଚିଥିଲା ବନ ବିଭାଗ । ଏବେ ଶିମିଳିପାଳ ରେ ୧୦୦ ଟି AI କ୍ୟାମେରା ଓ ୧୦୦ ଟି AR କ୍ୟାମେରା, ୮୫୦ ଟ୍ରାପ କ୍ୟାମେରା ଲାଗିଛି । ଗତ ୫-୬ ମାସ ମଧ୍ୟରେ ଶିମିଳିପାଳ ଅଞ୍ଚଳରେ ୨୭ଟି କେସ ହୋଇଛି । ୮୬ ବନ୍ଧୁକ ଜବତ ହୋଇଛି । ୪୫ ଜଣ ନିଜେ ଆସି ବନ୍ଧୁକ ସରେଣ୍ଡର କରିଛନ୍ତି । ୧୦୦ ଲୋକ ଧରା ପଡ଼ିଛନ୍ତି । ଆଗାମୀ ଦିନରେ ଶିମିଳିପାଳ ସୁରକ୍ଷା ପାଇଁ ଆଉ ୧୫୦ କ୍ୟାମେରା ଲାଗିବ । ଏକ ପ୍ଲାଟୁନ ପୋଲିସ ଫୋର୍ସ ମୁତୟନ ହେବେ ।